Qətiyyətli siyasətin uğurlu nəticəsi – Məhəmməd NƏRİMANOĞLU,-BAKÜ / TURKISHFORUM – ABDULLAH BTÜRER YENER
Azərbaycan Prezidenti İlham Əliyev hələ 44 günlük Vətən müharibəsi başlamamışdan xeyli əvvəl qətiyyətlə bəyan edirdi: “Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır”.
Dövlət başçısı bu tarixi həqiqəti 2007-ci il martın 9-da öz təşəbbüsü ilə keçirilən dünya ölkələrindəki Azərbaycan və türk diasporları rəhbərlərinin Bakı Forumunda bütün kəskinliyi ilə bəyan etmişdi. Bununla da bir daha təsdiqlənmişdi ki, dövlət başçısı milli məsələlərdə güzəştə getməyən liderdir. O, hakimiyyətə gələndən böyük Zəfər gününə kimi, 17 il ərzində yorulmadan, heç bir güzəştə getmədən Qarabağ məsələsində təcavüzkar Ermənistana, onun havadarlarına, supergüclərə qarşı qətiyyətlə mübarizə apararaq, Azərbaycanın haqq səsini dünyaya çatdırdı. Azərbaycan Prezidenti müharibəyə kimi ən geniş beynəlxalq arenalarda, ən yüksək kürsülərdə dəfələrlə bütün dünyaya bəyan etdi ki, Qarabağ Azərbaycanın ayrılmaz tərkib hissəsidir. Ölkəmiz bu məsələdə heç bir güzəştə getməyəcək.
Azərbaycan Prezidentinin müxtəlif tədbirlərdə dəfələrlə söylədiyi “Azərbaycan torpaqları danışıqların mövzusu ola bilməz” fikri Dağlıq Qarabağ məsələsində nə qədər prinsipial, güzəştsiz olduğunun göstəricisidir. Bu prinsipiallıq onun yalnız Ermənistana, dünyaya yayılmış erməni lobbisinə qarşı yox, həm də beynəlxalq ikili standartlara, düşmənə himayədarlıq edən supergüclərə, dövlətlərə qarşı qətiyyətli mübarizəsi idi. Hələ 2016-cı ildə “Rossiya seqodnya” BİA-nın direktoru Dmitri Kiselyova müsahibəsində qətiyyətlə bildirirdi: “Biz heç bir zaman Dağlıq Qarabağa müstəqillik verilməsi ilə razılaşmayacağıq və erməni tərəfi də bunu əla bilir. Amma ağıllı kompromis mümkündür, Dağlıq Qarabağda əhalinin təhlükəsizliyinin, həyat fəaliyyətinin, özünüidarəsinin təmin olunması, Azərbaycan tərəfindən müxtəlif investisiya layihələrinin həyata keçirilməsi, Dağlıq Qarabağın hüdudlarından kənardakı ərazilərin azad olunması şərti ilə iki xalq arasında qarşılıqlı yolla sülh – bax, biz münaqişənin həllini belə görürük. Bunlar hazırda üzərində işlədiyimiz və vasitəçilərin irəli sürdüyü təkliflərlə uzlaşır. Dediyim kimi, Azərbaycanın ərazi bütövlüyü ətrafında kompromis ola bilməz…”
Bu fikirlər dövlət başçısı İlham Əliyevin yenilməyən qətiyyəti idi. 3 oktyabr 2019-cu ildə Soçidəki “Valday” forumunda çıxışı zamanı Dağlıq Qarabağ münaqişəsinə toxunaraq dediyi fikir də dillər əzbəri oldu: “Mən Ermənistan baş nazirinin təəccüb doğuran “Qarabağ Ermənistandır və nöqtə” bəyanatına toxunmaq istərdim. Birincisi, bu, yumşaq desək, yalandır. Qarabağ aranlı-dağlı bütün dünyada Azərbaycanın ayrılmaz hissəsi kimi tanınmışdır. Ermənistanın özü bu qanunsuz qurumu tanımır. Qarabağ əsl Azərbaycan torpağıdır. Beləliklə, Qarabağ Azərbaycandır və nida işarəsi!”
Dağlıq Qarabağ problemi ilə bağlı dönməz və ardıcıl siyasi iradə nümayiş etdirən Prezident İlham Əliyevin bu cəsarətli mövqeyi xalqımız tərəfindən razılıqla qarşılanır, alqışlanır və bizi tarixi qələbəyə yaxınlaşdırırdı. Prezident hər şeydən öncə bu illərdə güclü ordu-güclü dövlət-güclü iqtisadiyyat strategiyası ilə vəhdətdə, azərbaycançılığa söykənən güclü xalq və kreativ, intellektual Azərbaycan vətəndaşı formulasında xalqın milli mənafeyini qorumağa, ölkəmizdə yaşayan bütün xalqların birgəyaşayış həyat tərzinə hörmət amilini formalaşdırdı.
Bu illər ərzində Ali Baş Komandan ordu quruculuğuna xüsusi diqqət yetirir, ölkənin Silahlı Qüvvələrini Cənubi Qafqazın ən qüdrətli ordusuna çevirirdi. 2021-ci ildə “Global Firepower” təşkilatının yekunlarına əsasən, Azərbaycan Silahlı Qüvvələri “dünyanın ən güclü ordusu” reytinqində 64-cü yerdə qərarlaşıb.
Tariximizin ən şanlı səhifələrindən olan Aprel və İyul döyüşləri kiçik bir məkanı əhatə etsə də, sanki dünyanın böyük bir mövzusuna çevrildi. İyul döyüşündə isə mənfur ermənilərin təxribatı o demək idi ki, Ermənistanın yeni rəhbərliyi Azərbaycana qarşı fəal şəkildə müharibəyə hazırlaşır. Dağlıq Qarabağdan və ümumilikdə münaqişə zonasından kənarda yerləşən Tovuzda 2020-ci ilin iyulunda baş verən təxribat da düşmənin “yeni strategiya”sının tərkib hissəsi idi. Düşmən Tovuz ətrafında yerləşən strateji yüksəklikləri ələ keçirməyə cəhd etdi. Azərbaycan Ordusu düşmən təxribatının qarşısını alsa da, general Polad Həşimov və polkovnik İlqar Mirzəyev, həmçinin bir neçə əsgər və zabitimiz qəhrəmanlıqla şəhid oldu. Avqust ayında düşmənin Tərtər istiqamətində təxribatçı-kəşfiyyat qrupu zərərsizləşdirildi. Qrupa rəhbərlik edən erməni zabiti isə əsir götürüldü. Bütün bunlar Ermənistanın Azərbaycana qarşı növbəti dəfə müharibəyə hazırlaşdığının əyani sübutu idi. Ali Baş Komandanın yaratdığı güclü ordu ilə döyüşlər həm də ermənilərə Azərbaycan adlı məmləkətin nə qədər böyük miqyasa sahib olduğunu bir daha təsdiqlədi.
Buna baxmayaraq, İlham Əliyev var gücü ilə məsələnin qansız-qadasız həllinə çalışır, amma hər zaman müharibə yolunun da istisna olunmadığını vurğulayırdı. Müharibənin başlanğıcı hesab edilən Aprel və İyul döyüşləri zamanı dövlət başçısı tam əminliklə bildirirdi ki, istənilən yolla Azərbaycanın suverenliyi, ərazi bütövlüyü bərpa ediləcək. Dedi və etdi!
Zəfərimizin bir illiyi xüsusi təmtəraqla, həm də Qarabağda, Şuşada, illərlə erməni vandalizminin qurbanına çevrilmiş, ötən ilin 8 noyabrından azad edilmiş tarixi Azərbaycan ərazilərində qeyd edildi. Şuşa nəinki azad edildi, həm də Qarabağda düşmən üzərində tarixi Zəfərimizin bayrağı qaldırılan qala, mədəniyyət paytaxtı, musiqi festivalları şəhəri kimi yeni növrağına qovuşdu…
Məhəmməd NƏRİMANOĞLU,
Qətiyyətli siyasətin uğurlu nəticəsi
